Салық органдары танымал блогерді қайта тексеріп жатыр, деп хабарлайды ALASH.KZ Skifnews.kz ақпарат порталына сілтеп.
Kozachkov offside телеграм арнасының мәліметінше, алардың арасында Instagram арқылы 1,5 миллиард теңгенің онлайн курс сатылымын жүзеге асырған Дархан Жолшыбеков те бар.
Алайда аталған табыс еш жерде көрсетілмеген. Комитет тарапынан сұрақтар қойылған соң, блогер өз еркімен мемлекетке төленуі тиіс қаржыны өтеп, заң талабын орындады.
Сонымен қатар, бұл оқиғаны әдеттегідей желідегі контентке айналдыруды да ұмытқан жоқ.
Ресми мәліметке сүйенсек, Жолшыбековтен бөлек тағы 400-ге жуық блогер мемлекет қазынасына шамамен 700 миллион теңге қосымша салық төлеген. Қазіргі таңда оларға қатысты ешқандай талап қойылып отырған жоқ.
Дегенмен, әлеуметтік желі арқылы ірі көлемде табыс тапқан тағы төрт блогерге қатысты Мемлекеттік кірістер комитеті салықтық тексеру жүргізу туралы бұйрық шығарды. Жалпы сома – 2,2 миллиард теңге.
Салық органдарының айтуынша, түсіндіру жұмыстары жалғасып жатыр.
