Қаңтаршының жесірі әкімдік алдына түнемек, деп хабарлайды Alash.KZ Ulysmedia.kz сайтына сілтеме жасап.
2022 жылғы Қаңтар оқиғасы кезінде күйеуі оққа ұшып, қаза болған Миясар Тілеумұратова Алматы әкімдігіне үш баласымен, үш сөмке киім-кешегін арқалап барды.
Ол әкімдіктен пәтер беруді сұрады. Сөзінше, ақшасын төлей алмаған соң, жалдап отырған пәтерінен шығарып жіберген. «Барар жер, басар тауым қалмады» дейді ол.
Миясар Тілеумұратова Алматының Наурызбай ауданында пәтер жалдап тұрған.
Төрт баласының үлкені 14, кішісі 3 жаста. Күйеуі Талғат Қашыбеков оққа ұшқанда кенжесіне аяғы ауыр болған. Миясар осы уақытқа дейін Астанаға президент әкімшілігі мен бас прокуратураға көмек сұрап бірнеше рет барған.
Соңғы рет барғанында ондағылар екі апта күту керектігін айтқан.
Миясар Тілеумұратова екі апта күте алмаймын дейді. Талабы орындалмаса әкімдік алдында түнемек.
