Ақтөбеде кішкентай қызды құдықтан құтқарғысы келген бүгінгі күннің батыры туралы тың ақпарат шықты, деп хабарлайды ALASH.KZ Azattyq Rýhy сайтына сілтеме жасап.
38 жастағы Нұрбол Бердіғалиев мықты спортшы, тәлімгер болған. Бір отбасының тірегі, 6 баланың әкесі еді. Ол 2017 жылы қыркүйек айынан бастап Жарлы ауылына қоныс аударып, сонда балаларды еркін күреске баулыған. Өмірінің соңына дейін 40-қа жуық республикалық, облыстық деңгейдегі жарыстардың жүлдегерлері мен жеңімпаздарын дайярлап шығарған. Оның 20 шәкірті Қазақстан Республикасының «Спорт шеберлігіне үміткер» нормативін орындаған.
Бүгін Нұрбол Бердіғалиев 9 жасар қызды құдықтан шығарып алам деп көзсіз ерлікке барған. Ол жеке үйдің ауласында орналасқан ескі құдыққа түскен.
«Бұл екі үйге ортақ ескі құдық. Аузын ағашпен ескі «покрышкамен» жауып бастырып қойған. 2-3 бала тығылып ойнап жүрген кезде қыз бала құдыққа түсіп кеткен. Құдық шамамен 10 метр, ескі пайдаланылмайтын құдық. Ішіне қоқыс салатын болған. Сол кезде көмекке көршісі Нұрбол Бердіғалиев келіп, құдыққа түсті. Бірақ құдық түбіндегі иістен уланып екеуін де құтқарушылар шығарып алды», - деді Байғанин ауданының әкімі Айбек Көпенов.
