2024 жылдың 25 желтоқсанында Ақтау маңында апатқа ұшыраған әзірбайжандық Embraer 190 жолаушылар ұшағына қатысты ресейлік капитан Дмитрий Паладичуктің түсіндірме хаты жария етілді, деп хабарлайды Alash.kz.
Minval басылымының хабарлауынша, хатпен бірге оқ ату сәтіне қатысты бейне және аудиожазбалар да келген. Құжатта капитан тұман салдарынан визуалды түрде көрінбеген, бірақ радар арқылы тіркелген нысанға оқ атуға бұйрықты өзі бергенін растаған. Бірінші зымыран нысанаға тимеген соң, екінші мәрте оқ атуға пәрмен берген.
The Insider басылымы Паладичуктің Ресейдің әуе шабуылына қарсы қорғаныс бөлімдерінде қызмет еткенін және бұл түсіндірмені шынайы жазғанын растады. Хаттағы қолтаңба мен дауыс сараптамасы да бұл деректі қуаттайды.
Естеріңізге сала кетейік, апат кезінде ұшақта 67 жолаушы болған, оның 38-і қаза тауып, 29-ы аман қалған. Оқиға халықаралық деңгейде резонанс тудырып, Ресей тарапының әрекетіне қатысты сынға ұшыраған болатын.
