Астанада жолаушылар автобусы қатысқан жол-көлік оқиғасы болды, деп хабарлайды ALASH.KZ.
Telegram-дағы Astanovka98 арнасының мәліметінше, оқиға Республика көшесінде болған.
Алдын ала ақпарат бойынша, жүргізуші маневр жасау кезінде көлік тізгініне ие бола алмай, ақпараттық тақтаның тірегіне соғылған.
Апат кезінде автобус салонында жолаушылар болған.
Қақтығыс салдарынан 10 адам зардап шекті. Қоғамдық денсаулық сақтау басқармасының мәліметінше, жарақат алғандар қаланың әртүрлі стационарларына жеткізілді.
Олардың екеуі – Ұлттық шұғыл медицинаны үйлестіру орталығына жатқызылып, тиісті медициналық көмек көрсетілуде.
Зардап шеккендердің бірі ауыр халде, қазір оған шұғыл операция жасалып жатыр.
Полиция өкілдері жол апатына байланысты қылмыстық іс қозғалғанын, оқиғаның барлық мән-жайын анықтау мақсатында тергеу жұмыстары жүргізіліп жатқанын хабарлады.
