Бүгін, 2 шілдеде АҚШ президенті Дональд Трамп Truth Social желісіндегі ресми парақшасында Израильдің Газа секторында екі айлық атысты тоқтату туралы шарттарға келіскенін мәлімдеді, деп хабарлайды Alash.kz.
Трамптың сөзінше, Вашингтон өкілдері Израиль жағымен ұзақ әрі нәтижелі келіссөз жүргізіп, атысты тоқтату туралы ортақ шешімге келген.
"Бүгін менің өкілдерім Израиль өкілдерімен Газа мәселесіне байланысты ұзақ әрі өнімді кездесу өткізді. Израиль 60 күндік уақытша бітімге қажет шарттарға келісім берді. Осы уақыт аралығында біз соғысты тоқтату үшін барлық тараппен жұмыс істейтін боламыз", – деп жазды Трамп.
Алайда АҚШ басшысы бұл шарттардың нақты қандай екенін ашып айтпады.
Оның айтуынша, Катар мен Египет өкілдері – Таяу Шығыстағы бейбітшілікті орнатуға белсенді атсалысып жатқан елдер – ХАМАС тобына соңғы ұсынысты жеткізеді.
"Таяу Шығыстың игілігі үшін ХАМАС бұл келісімді қабылдайды деп үміттенемін. Өйткені жағдай жақсармайды – бұдан да жаман болады", – деді АҚШ президенті.
Бұл мәлімдеме Газа секторындағы ұзаққа созылған қақтығыстар мен гуманитарлық дағдарыс аясында айтылып отыр. Енді халықаралық қауымдастық ХАМАС-тың шешімін күтуде.
