Алматы облысында ер адам әйелін сабап, оқиғаны видеоға түсірген, деп жазады Alash.kz ұлттық порталы.
Tengrinews.kz хабарлауынша, Асиям есімді жәбірленуші әйел әлеуметтік желіде видео жариялап, күйеуінің есірткіге тәуелді екенін айтты. Соққы салдарынан Асиямның мұрны сынып, құлағы зақымданған.
"Жала жауып отыр маған, мен кешірмеймін бұл нашақорды. Менің туыстарыма мені өлтірсе де бәрібір. Сыныптастарыма рақмет, мені құтқарды. Шашымнан сүйреп, қылқындырып, құлақтан теуіп, жудырықпен ұрды. Мұрным сынған, барлық жерлерім көгерген. Шелектің ауруханасы мен АІІД мені тентіртті, көше кезіп жүрдім таң атқанша", – деп жазды ол.
Алматы облысы Полиция департаментінің баспасөз қызметі мәліметінше, ұрып-соғу дерегі бойынша қылмыстық іс тіркелген. Күдікті ұсталып, уақытша ұстау изоляторына қамалған.
"Сотқа дейінгі тергеу аясында оқиғаның мән-жайын жан-жақты әрі объективті анықтау үшін барлық қажетті тергеу әрекеттері жүргізіліп жатыр. Аталған шаралар нәтижесі бойынша түпкілікті процессуалдық шешім қабылданады", – деді ведомство.
