Жетісу облысында 32 жастағы Айзат Жұманованың жан түршігерлік жағдайда қаза табуы елді есеңгіретіп, қоғамның ашу-ызасын туғызды. Қайғылы оқиға Баласаз ауылында 22 маусым күні болған, деп хабарлайды Alash.KZ.
Марқұмның туыстарының айтуынша, Айзат өз күйеуі Айбар Жанболаттың қолынан көз жұмған. Оны аса қатыгездікпен азаптап өлтірген. Түнгі сағат 2:30 шамасында ауыр халде Талдықорғандағы облыстық ауруханаға жеткізілгенімен, жарты сағаттан кейін дәрігерлер оның қайтыс болғанын растаған. Десе де, туыстары Айзаттың ауруханаға жетпей-ақ жан тапсырғанына сенімді.
Медициналық сараптама қорытындысы марқұмның ауыр азапталғанын дәлелдейді: бас сүйегінің негізі сынған, миы зақымданған, аяқ-қолдары мен жамбас сүйектері бірнеше жерден сынған. Денесінде сүйретілген іздер, білектерінде терінің түгел сыпырылып кеткені жазылған.
Туыстары оны арқанмен байлап, атқа сүйреткен деген болжам айтуда. Айзаттың анасы Салтанат Жұманова қызының денесі қорлықтан адам танымастай өзгеріп кеткенін айтады.
Тағы бір ауыр жайт Айзат жүкті болған және бүкіл оқиға оның екі жасар қызының көз алдында болған. Қазір бүлдіршін ауыр күйзеліске түсіп, күн сайын анасының атын атап жылайды.
«Бұл абайсыздық емес, бұл азаптау. Ол саналы түрде өлтірді, кейін ізін жасыруға тырысты», — дейді марқұмның туыстары.
Айзаттың күйеуі Айбар Жанболат ауылда фермерлікпен айналысатын азамат. Оқиға болған түні мас болғаны, ауруханада өзін агрессивті ұстағаны айтылады. Ол бұған дейін Қапал ауылының әкімі болуға үміткер болған.
Қазіргі таңда полиция Қылмыстық кодекстің 106-бабы 3-бөлігі (Денсаулыққа қасақана ауыр зиян келтіру, абайсызда өлімге әкеп соғу) бойынша іс қозғаған. Алайда Айзаттың туыстары мұнымен келіспей, істі айрықша қатыгездікпен жасалған кісі өлтіру бабына ауыстыруды талап етуде.
