Құрық ауылында ондаған жасөспірімнің қатысуымен жаппай төбелес орын алды. Бұл оқиғаның видеосы әлеуметтік желіде кеңінен таралып кетті, деп хабарлайды Alash.kz.
Бейнежазбадан топ-топ болып төбелесіп жатқан жасөспірімдерді көруге болады. Олар қолдарына таяқ ұстап, бір-біріне сес көрсетіп жүр. Сондай-ақ мылтықтың дыбысына ұқсас жарылыстар да естіледі. Полиция төбелеске қатысқан барлық жасөспірімді анықтап, бөлімшеге жеткізгенін мәлімдеді.
Жасөспірімдердің ата-аналарына қатысты әкімшілік хаттамалар толтырылды. Ал оқиға бойынша ҚР Қылмыстық кодексінің 293-бабы "Бұзақылық" бойынша қылмыстық іс қозғалды. Барлық жасөспірім профилактикалық есепке қойылды.
Полиция департаменті кәмелетке толмағандардың құқықбұзушылықтары үшін бірінші кезекте олардың заңды өкілдері жауапты екенін ескертеді. Сондай-ақ, ведомство ата-аналарды балалардың бос уақытын қатаң бақылауға алуға шақырды.
