Петропавлда такси қызметкерлері қаза тапқан әріптесін еске алып, жеті күндік аза жариялады, деп хабарлайды ALASH.KZ.
60 жастағы такси жүргізушісі шақырту кезінде болған жанжалдан кейін көз жұмды. Қайғылы оқиға 8 маусым күні орын алған.
Жергілікті қызметкерлердің айтуынша, марқұм мас күйінде болған жолаушыларды мінгізген. Олардың бірі көлік ішінде шылым шегуге тырысқан. Жүргізуші ескерту жасағанымен, ол оған мән бермеген. Жол барысында жанжал күшейіп, межелі жерге жеткенде жолаушымен төбелес басталып кеткен.
Сол сәтте такси қызметкері басымен асфальтқа соғылып, ауыр жарақат алған. Дәрігерлер бірнеше күн бойы оның өмірі үшін күресті. Алайда, 13 маусым күні ол ауруханада көз жұмды.
– Петропавлда полиция қызметкерлері 60 жастағы такси жүргізушісіне ауыр дене жарақатын салды деген күдікпен бір азаматты ұстады. Қазіргі уақытта оқиғаның барлық мән-жайы мен себептерін анықтау мақсатында қажетті тергеу шаралары жүргізіліп жатыр, – деп мәлімдеді Солтүстік Қазақстан облысы Полиция департаментінің баспасөз қызметі.
Бүгін петропавлдық такси қызметкерлері марқұм әріптестерімен қоштасты. 14 маусымнан бастап олар жеті күндік аза тұту жариялады.
Қайғы мен естелік белгісі ретінде жүргізушілер көліктерінің айнасы мен антеннасына қара таспа байлап, жолға «апатты жарық» шамдарын қосып шықты.
“Жүргізушілердің өмірі – бұл жай ғана статистика емес. Біз күн сайын жолға шығатын адамдардың қауіпсіздігіне көз жұма қарамауды сұраймыз. Ол – біздің арамыздағы адам еді. Біз оны ұмытпаймыз”, – деп жазды қызметкерлер әлеуметтік желіде.
Сондай-ақ, олар такси қызметі қосымшаларына «дабыл түймесі» функциясын қайтару жөнінде үндеу жолдады.
