Қытай Орталық Азияның 5 еліне 1,5 млрд юань қайтарымсыз көмек ұсынбақ, деп хабарлайды ALASH.KZ.
– Қытай Халық Республикасының төрағасы Си Цзиньпин Орталық Азия елдерін «Бір белдеу – бір жол» жобасын әрі қарай да ілгерілете түсуге үндеді.
- Біз биыл Орталық Азия елдеріне халықтың әл -ауқатын арттырып, бірлесіп дамуға мүмкіндік беретін жобаларды қолдау үшін 1,5 млрд юань мөлшерінде қайтарымсыз көмек көрсетуге дайынбыз, - деді Қытай басшысы Астанадағы саммитте.
ҚХР төрағасы Орталық Азия елдерін «Бір белдеу – бір жол» жобасын әрі қарай да ілгерілете түсуге үндеді.
- Қытай әрдайым Орталық Азия мемлекеттерінің сенімді және ізгі көршісі болып қала береді. Біз Орталық Азия елдерімен тең дәрежеде, шынайы әрі достық ниетпен қарым-қатынас орнатып келеміз және бұл достық әрдайым гүлдене береді. Бүгін біз мәңгілік достық пен ынтымақтастық туралы келісімге қол қоямыз. Бұл келісім біздің қарым-қатынасымызды құқықтық тұрғыдан бекітеді. Бұл – алты ел арасындағы қарым-қатынас тарихындағы жаңа белес және Қытайдың көршілес елдермен жүргізіп отырған сыртқы саясатының ірі жетістігі. Мұның игілігін қазіргілер де, келешек ұрпақ та көретіні анық, - деді Си Цзиньпин.
Айта кетейік, елордада «Орталық Азия – Қытай» ІІ саммиті өтіп жатыр.
Іс-шараға Мемлекет басшысы Қасым-Жомарт Тоқаев, ҚХР төрағасы Си Цзиньпин, Өзбекстан Президенті Шавкат Мирзиёев, Қырғызстан Президенті Садыр Жапаров, Түрікменстан Президенті Сердар Бердімұхамедов және Тәжікстан Президенті Эмомали Рахмон қатысып отыр.
«Орталық Азия - Қытай» І саммиті 2023 жылдың 19 мамырында Қытайдың Сиань қаласында өткен еді.
