Астанадағы Назарбаев Зияткерлік мектебінің 11-сынып оқушысы Батырхан Мұхтархан Грекияда өткен экономикадан халықаралық олимпиадада (EO-2025) бас жүлдені жеңіп алды, деп хабарлайды Alash.kz.
Олимпиадаға әлемнің түкпір-түкпірінен 100 мыңнан астам оқушы қатысуға ниет білдірген. Ұлттық кезеңнен өткен үздіктер ғана финалға жолдама алып, ақтық сында 128 дарынды жас бақ сынады. Қатысушыларға экономика мен қаржыға қатысты күрделі тапсырмалар берілді – нақты жағдайларды талдау, шешім қабылдау, есептер шығару секілді сынақтардан өтті.
Батырхан барлық кезеңде жоғары нәтиже көрсетіп, АҚШ, Канада, Қытай, Нидерланды, Польша және өзге елдердің өкілдерін басып озды. Ол 28 елден келген ең мықты оқушыларды артта қалдырып, абсолютті чемпион атанды.
“Маған ең бастысы – жаңа білім алу мен өзімді шыңдау. Жетістіктерім арқылы замандастарымды жігерлендіргім келеді”, – дейді жас зияткер.
Бұл – Батырханның алғашқы жетістігі емес. Бұған дейін ол экономика және қаржы пәндерінен республикалық олимпиаданың қола жүлдегері атанған. 2024 жылы Гонконгта өткен халықаралық олимпиадада да қола медаль иеленген. 2025 жылы Әзербайжандағы жарыста алтын жеңіп алып, Қазақстанда өткен EFI олимпиадасында үздік шыққан болатын. Енді, EO-2025 додасында ең жоғары нәтижеге қол жеткізді.
