Талғарда болған қанды оқиғаға қатысты жәбірленуші тарап пен адвокат Ұлысмедиаға сұхбат беріп, жаңа деректерді мәлімдеді, деп жазады Alash.kz.
Адвокат Гаухар Сариеваның айтуынша, күдікті 1998 жылы туған. Бұған дейін ол автокөлік алаяқтығына байланысты тергелген. Ал жәбірленуші Аружан – медбике.
Адвокаттың сөзіне қарағанда, күдікті автокөлік иелерін алдап, «арзанға» немесе «рассрочкаға» аламын деп сендірген, кейін қайта сатып отырған. Бұл істерін жүзеге асыру үшін ол Аружанның Kaspi шотын пайдаланған және тіпті оның атына бір көлікті рәсімдеп, сатып жіберген. Осыдан кейін қыз қатты қорқып, қысымға түскен.
Бір ай бойы күдікті Аружанды қудалап, «зорлық үшін арыз жазып қояды» деп қорқытып, тәулік бойы (24/7) байланыста болған. Қысымға шыдамаған қыз дәрі ішіп, өзіне қол жұмсамақ болған, бірақ дәрігерлер дер кезінде көмек көрсетіп, өмірін сақтап қалған.
Аружан полицияға арызданған соң, күдікті мылтық ұрлап, көшеде оның ағасын атып өлтірген. Кейін қыздың өзін үйінен алып кетпек болған. Бірақ сол сәтте Аружан көршісіне дәрі егуге кеткендіктен, үйінде болмаған. Осыны пайдаланған күдікті оның екі жасар қызын алып кеткен.
Полицейлер дер кезінде жеткенімен, күдікті сәбиімен бірге көлікті тауға құлатып, қашпақ болған. Машина толық қирағанымен, ол да, бүлдіршін де тірі қалды.
«Баланы дәрігерлер, гинекологтар толық тексерді. Ол жағынан бәрі жақсы. Көлік апатында бүлдіршіннің тілі жарақаттанған, шағын ота жасалады, – деді адвокат.
Қайғыдан қан жұтып отырған отбасы түн ұйқысынан айырылып, «Шерзаттың үйін өртегендей, бізді де өртеп кетпей ме» деп үрейде жүргенін жеткізді.
Балалардың құқықтарын қорғау комитетінің тапсырмасымен психологиялық қолдау орталығының мамандары оқиға орнына жіберіліп, жәбірленушілерге көмек көрсетуде. Сондай-ақ Алматы облысының балалар құқықтары жөніндегі өңірлік уәкілі де істі бақылауда.
Полиция «ер адамды өлтіру» және «бала ұрлау» баптары бойынша қылмыстық іс қозғады. Алдын ала тергеу нұсқасына сәйкес, күдікті қыздың анасымен жақын қарым-қатынаста болған. Жанжал кезінде ол Аружанның ағасын атып, ер адам оқиға орнында қаза тапқан.
