Шымкентте 9-сынып оқушысы өз үйінің сарайында асылып қалды, деп хабарлайды Аlash.kz.
Өмірсерік Сұлтанбектің денесін анасы тапқан. Жасөспірім не себептен өз-өзіне қол жұмсағанына қатысты жазба қалдырған.
Жазбасында сыныптастарының аттарын атап: "Доспын деп жүргендер, қуаныңдар. Енді мені көре алмайсыңдар. Енді ешқайсың да мені ұра алмайсыңдар" деп жазған.
Жасөспірімнің жақындары оның өліміне мектептегі жүйелі буллинг себеп болғанын айтады. Баланың телефонынан табылған жазбада ол төрт сыныптасын атаған.
Анасы Жанерке Жүнісбекова кейінгі үш жылда ұлының мектептегі құрдастарының қоқан-лоққысына жиі ұшырағанын айтады.
«Әкесінің қайтыс болғанын бетіне басып, мазақтап келді. Бір бала ақша мен темекі әкелуге мәжбүрлейтін. Қолынан келгенін істететін», – дейді ол.
Қайғылы жағдай қаладағы №32 мектепте болған. Құрбанының әпкесі де осы білім ордасында оқып, өзі де буллингке куә болғанын айтады. Алайда мектеп басшылығы фактіні жоққа шығарды.
«Біз бұл оқиға туралы кеш білдік. Ешқандай төбелес, ақша жинау болмаған. Оқушыны ешкім ұрған жоқ», – деді тәрбие ісі жөніндегі орынбасар Райхан Тұлеева.
Оқушының соңғы хатында аты аталған төрт сыныптасының бірі бұған дейін полиция есебінде тұрған деп хабарланды. Қазіргі таңда бұл фактіге байланысты қылмыстық іс қозғалды. Марқұмның туыстары кінәлілерді және мектеп әкімшілігін жауапқа тартуды талап етуде.
