Алматы облысында кәмелетке толмаған қызды азаптаған екі әйел ұсталды, деп хабарлайды Аlash.kz.
Алматы облысының Еңбекшіқазақ ауданында 16 жастағы жасөспірім қызға қатыгездік көрсеткен екі әйелдің әрекеті қоғамды дүр сілкіндірді. Бұл жайлы KYN.KZ ақпарат агенттігі жазды.
Полицияның мәліметінше, 29 жастағы екі келіншек жасөспірімді үйінен алдап алып шығып, көзден таса жерде бірнеше сағат бойы азаптаған. Олар қыздың қолын темекімен күйдіріп, соққыға жығып, басын суға батырған.
Сондай-ақ, зорлық-зомбылық әрекеттерін видеоға түсіріп отырған.
Тергеу материалдарына сәйкес, қылмысқа қызғаныш себеп болған. Жәбірленуші күдіктілердің бірінің жігітімен сөйлесіп жүрген. Осыны сылтау еткен әйелдер қызды қорқытып, ауыр азаптауларға барған.
Бірнеше сағаттық қорлықтан кейін қызды үйлеріне апарып тастаған олар жәбірленушіні ешкімге айтпауға мәжбүрлеген.
Дегенмен, кейіннен қыз болған жағдайды анасынан жасырмай жеткізген. Анасы дереу полицияға шағымданып, күдіктілер 2 қыркүйекте ұсталып, уақытша ұстау изоляторына қамалды.
«Қазіргі таңда сотқа дейінгі тергеу амалдары жүріп жатыр. Күдіктілер заңға сәйкес қатаң жауапкершілікке тартылатын болады», – деп хабарлады полиция департаментінің баспасөз қызметі.
