Францияда өткен баспасөз мәслихатында Украина президенті Владимир Зеленский Ресей басшысы Владимир Путиннің Мәскеуде кездесу өткізу туралы мәлімдемесіне жауап қатты, деп жазады Alash.KZ.
Зеленскийдің айтуынша, мұндай келіссөздердің болғаны екі жаққа да керек.
«Кездесу керек. Бұл қалағанымыз үшін емес, бұл – қажеттілік. Біз бұған дейін де үшжақты да, екіжақты да форматтағы кездесулерге дайын екенімізді білдірдік. Бірақ Ресей барынша уақытты созып келеді. Америкалық әріптестеріміз бізге Путиннің Мәскеуге шақырғанын жеткізді. Егер біреу кездесуді шынымен қаламаса, онда ол мені Мәскеуге шақырады деп ойлаймын», – деді ол.
Украина президенті сонымен бірге, Путиннің кездесу жайлы сөз қозғауының өзі белгілі бір деңгейде оң қадам екенін, бірақ соғысты тоқтатуға деген нақты ниет Ресей тарапынан байқалмай отырғанын атап өтті.
«Мұндай деңгейдегі келіссөздер бос әңгімемен аяқталмауы тиіс. Негізгі нәтиже – соғыстың аяқталуы болуы керек», – деді Зеленский.
Ресей президентінің баспасөз хатшысы Дмитрий Песков бұл пікірге жауап қатып, Путиннің Зеленскийді Мәскеуге «капитуляцияға емес, сөйлесуге» шақырғанын айтты.
Бұған дейін Путин Зеленскийді Ресей астанасына шақырып, «егер ол дайын болса, кездесуге болады» деген еді.
Ал Украина Сыртқы істер министрі Андрей Сибига мұндай ұсынысты «қабылдауға болмайды» деп бағалады. Оның айтуынша, қазіргі таңда Австрия, Ватикан, Швейцария, Түркия және Парсы шығанағындағы үш мемлекет Украина мен Ресей басшыларының кездесуіне алаң болуға дайын екенін білдірген.
«Бұл – салмақты ұсыныстар. Зеленский мұндай кездесуге кез келген сәтте дайын», – деп жазды министр.
Осыған байланысты АҚШ президенті Дональд Трамп та пікір білдірді. Ол Киев пен Мәскеу арасындағы келіссөздерге қол жеткізуге ниетті екенін, бірақ қазіргі жағдайда тараптар жеке кездесу өткізуге дайын еместігін айтты.
«Мен мұны бақылап отырмын, әрі президент Путинмен де, президент Зеленскиймен де сөйлестім. Бірдеңе болатыны анық, бірақ әзірге олар дайын емес. Дегенмен, біз бұл істі жүзеге асырамыз», – деді Трамп CBS News арнасына берген сұхбатында.
