Көптен бері көзге түспей кеткен қоғам белсендісі Амантай қажы Хантемірұлының қатысуымен болған оқиға әлеуметтік желіде қызу талқыға түсті. Белгілі болғандай, ол бір әйелді баспалдақтан итеріп жіберіп, ауыр жарақат алуына себепкер болған, деп Alash.kz тілшісі Ulysmedia.kz сайтына сілтеме жасап хабарлайды.
Жәбірленуші Александра Колесникова есімді қолданушының жазуына қарағанда, Амантай қажы ұлттық киім киіп, қолында аса таяғы бар күйде белгісіз себеппен әйел адамға қол көтерген.
"Баспалдақтан итеріп жіберіп, жамбас сүйегін сындырып кетті. Бірақ соған қарамастан, ол жазасыз жүр. Енді басына таяқпен бір ұрғанын күтуіміз керек пе?" – деп ашынды Колесникова.
Алматы қалалық полиция департаментінің ресми өкілі Салтанат Әзірбектің айтуынша, оқиғаға байланысты Алмалы аудандық полиция басқармасы қылмыстық іс қозғаған.
"Қазір оқиғаның мән-жайын анықтау мақсатында жедел-іздестіру және процессуалдық іс-шаралар жүргізілуде. Сот-медициналық сараптамалар тағайындалды. Тергеу Алматы полициясы басшылығының бақылауында", – деді Салтанат Әзірбек.
