Ресей Федерациясының президенті Владимир Путин дүниежүзілік ақпарат агенттіктерінің жетекшілерімен кездесу өткізді. Ол Ресей мен Қазақстан арасындағы қарым-қатынастың одақтастық сипатқа ие екенін және ешқандай қиындататын факторлар жоқ екенін айтты. Бұл туралы ALASH.KZ мәлімдейді.
Путин Киевке жасалған соққылар, Украинамен келіссөздер, Трамппен мүмкін болатын кездесу және Иран мен Израиль арасындағы қақтығыс туралы да пікір білдірді.
Сонымен қатар, ол алғаш рет өзінің немересі туралы айтып, оның қытай тілінде еркін сөйлейтінін атап өтті.
Путиннің айтуынша, екі ел арасында тікелей мағынада одақтастық қарым-қатынас бар.
«Қазақстанмен бізде ерекше қарым-қатынас қалыптасқан, бұл баршаға түсінікті», – деді ол.
Сонымен қатар Путин әскери ынтымақтастық тақырыбын да қозғады.
Ол екі елдің де ҰҚШҰ (ОДКБ) ұйымына мүше екенін және қорғаныс министрліктері арасында тұрақты әріптестік орнағанын еске салды. Сонымен бірге, ұйым қызметі үшінші елдерге қарсы бағытталмағанын атап өтті.
«Мұндағы мақсат – біздің жауапкершілік аймағымызда қауіпсіздікті қамтамасыз ету», – деді Ресей президенті.
Президент Киевке жасалған соңғы шабуылдар туралы да пікір білдірді – шабуыл кезінде 28 адам қаза тапқан.
Путиннің айтуынша, ресейлік зымырандар тұрғын үй аудандарына емес, әскери нысандарға бағытталған.
Сондай-ақ Ресей Украинамен келіссөздер жүргізуге дайын екенін, тіпті Владимир Зеленскиймен кездесуге де қарсы еместігін айтты.
Алайда, Путиннің сөзіне қарағанда, басты мәселе – «құжаттарға кім қол қояды» деген сұрақта.
Ресей басшысы алғаш рет Иран мен Израиль арасындағы қақтығысқа қатысты пікір білдіріп, «ең дұрыс жол – соғыс қимылдарын тоқтатуға ұмтылу, келіссөз жүргізудің жолын табу және екі тараптың мүддесін қамтамасыз ету» екенін айтты.
Ол Ирандағы жерасты зауыттары туралы да айтып өтті: «Олар әлі орнында, ештеңе болмаған».
