Қарағандыда медбикеге жасалған шабуылға қатысты жаңа мәліметтер пайда болды. Бұл туралы зардап шеккен қыздың анасы айтып берді, деп жазады Alash.kz ұлттық порталы Azattyq Rýhy Instagram парақшасына сілтеме жасап.
Сәуле Тасмағамбетованың айтуынша, қызы сол күні жұмысында болған. Сағат төрттің шамасында үйіне қайтпақ болып, бір затын алу үшін кабинетке кірген. Сол кезде медициналық орталықта бір ер адам әйелі мен балаларымен жүрген. Сол ер адам қызы отырған қызметтік кабинетке кіргісі келген. Бірақ оған рұқсат берілмеді, өйткені ол - қызметкерлерге арналған бөлме.
Бейнежазбада ер адамның есікті күшпен ашуға тырысқаны анық көрінеді. Іште отырған қызы ғана емес, басқа медбикелер де оны тоқтатуға тырысқан. Бір әйел есікті жауып, оны ішке кіргізбеуге тырысады. Бірақ ер адамның күші басым болып, есікті жұлып ашады.
Полиция бұл оқиғаның рас екенін растады. Белгілі болғандай, күдікті психикалық денсаулығы нашар науқас ретінде психоневрологиялық орталыққа жатқызылған. Қазір ол дәрігерлердің бақылауында.