Жуырда еліміздің мақтанышы, белгілі әнші Димаш Құдайбергенге Қырғызстанның Халық әртісі атағы берілді. Қуанышты жаңалықты сүйіншілеген өнер иесінің анасы Светлана Айтбаева желіде ұлына арнап әсерлі жазба қалдырды, деп жазады Alash.kz ұлттық порталы.
“Димаштың "Мейкин Азия" байқауына барған кезі әлі есімде. “Ыстықкөлдің ауа-райына үйренсін, жолдан шаршағаны басылып , күш жинап , демалсын” деп бір апта бұрын үш баланы алы , Чолпон атаға келіп алдық. Ыстықкөлдің суына шомылып, дәмі балдай алмасын жеп , сұлу табиғатының аясында керемет демалдық. Димашты қолдап бізбен бірге сол кездегі “Азия дауысы” фестивалінің продюссерлері Мұрат Иргалиев пен Александр Пономарёв те келген еді. (Өкінішке орай екеуі де пандемия кезінде қайтыс болып кетті.) Сол байқауда Димаш жеңіске жетті, қырғыз елінің осы бір жүлдесі бар жеңістің бастауы болды. Содан бері 12 жыл өтіпті...
Он екі жылдың ішінде шүкір, ел қажетіне жарап, шығар биігіне абыроймен келе жатыр. Алла тек ғұмыр бергей деймін. Бірнеше мемлекеттерде жеке концерттерін берді, өзі қадір тұтатын dears тыңдармандары бар. Туған елінің құрметіне бөленіп 'Қазақстанның Халық әртісі' атанды. Бүгін, міне , қырғыз елінің қошеметіне бөленіп , "Қырғыз республикасының Халық Әртісі" атанып жатыр!
Қашан да бір-бірінің жақсылығына қуанып, қиналғанда қолдай білген , “қырғыз-қазақ бір туған” деп, бәйгеге түскен жүйрігінің тілеуін бірге тілеген , арасы ажырамаған ағайын едік, бүгінгі марапаттың мағынасы да екі елдің достығының, бірлігінің бейнесін айқындай түсті деп санаймын. Қырғыз халқына, мемлекет басшысы Садыр Жапаров мырзаға, қашан да мәдениет пен өнердің, руханияттың жанашыры болып жүретін Сұлтан Раев ағамызға, "Мейкин Азия" байқауының ұйымдастыру тобына, барша тілектес болған ағайынға зор құрметімді білдіремін! Баршаңызға ұрпақтарыңыздың қызық-қуанышына бөлене беріңіздер деймін!“,- деп жазды Светлана Айтбаева.
