Кенияда жеті жастағы бала қолтырауынның шабуылынан қаза тапты, деп хабарлайды ALASH.KZ turkystan.kz порталына сілтеп.
Линган Лотух Исайя есімді бала достарымен бірге Батыс Покот округіндегі Турквел өзеніне шомылып жүрген. Куәгерлердің айтуынша, «қолтырауын баланы суға сүйреп алып кеткен, ал қалған балалар қорыққаннан айқайлай бастаған».
Баланың әкесі болған жайтқа байланысты «жүрегім қан жылады, өйткені ұлымды қорғай алмадым» деп қайғысын жеткізді.
Іздестіру жұмыстарына жергілікті тұрғындар мен жабайы табиғатты қорғау қызметі жұмылдырылған. Нәтижесінде құтқарушылар баланың бөлшектеніп кеткен денесін тапты. Жыртқыш оның сол аяғын жеп қойған.
Турквел өзені қолтырауындардың көптігімен белгілі, дегенмен, ауызсу тапшылығы салдарынан жергілікті халық сол жерден су алуға мәжбүр. Билік өкілдері ата-аналарды мұқият болуға шақырып, адамдар мен жабайы табиғат арасындағы жанжалдардың алдын алу үшін қауіпсіздік шараларын күшейтуге уәде берді.
