1 тамыздан бастап АҚШ Қазақстаннан келетін барлық тауарларға 25 пайыз көлемінде кеден салығын енгізеді. Бұл туралы Дональд Трамп Truth Social желісіндегі парақшасында хабарлады, деп жазады Alash.kz ұлттық порталы.
Трамп бірқатар мемлекет басшысына жолдаған хаттарын жариялады. Олардың арасында Мемлекет бссшысы Қасым-Жомарт Тоқаевқа жазған ресми хаты да кездеседі.
"Құрметті Қасым-Жомарт Кемелұлы!
Бұл хатты Сізге жолдау - мен үшін үлкен құрмет. Бұл біздің сауда қатынастарымыздың мықты екенінің дәлелі. Америка Құрама Штаттары Қазақстанмен ынтымақтастықты жалғастыруға дайын екенін білдіреді, дегенмен Қазақстанмен арадағы сауда теңгерімсіздігі біз үшін алаңдатарлық.
Осы уақытқа дейін біз өзара әріптестікті сақтап келгенімізбен, енді бұл қарым-қатынасты әділетті және тең дәрежедегі саудаға негізделіп жалғастыруымыз қажет. Осыған орай, Сізді әлемдегі ең ірі нарық - Америка экономикасымен жаңа кезеңдегі ынтымақтастыққа шақырамыз.
2025 жылғы 1 тамыздан бастап АҚШ Қазақстаннан импортталатын барлық тауарларға 25% көлемінде кедендік баж салығын енгізеді. Бұл шара барлық салалық тарифтерден тыс, жеке түрде жүзеге асады. Егер қандай да бір қазақстандық өнімдер жоғары тарифтен жалтару мақсатында басқа ел арқылы жеткізілсе, оларға да осы жоғары тариф қолданылатын болады.
Айта кету керек, бұл 25 пайыздық мөлшерлеме АҚШ пен Қазақстан арасындағы сауда теңсіздігін толық жоюға жеткіліксіз, бірақ алғашқы қадам ретінде енгізіліп отыр. Алайда, егер қазақстандық компаниялар өз өнімдерін АҚШ аумағында шығару немесе өндірісті осы жаққа көшіру туралы шешім қабылдаса, онда олар үшін бұл тарифтер алынбайды. Мұндай жағдайда біз барлық рұқсаттар мен процестерді жедел әрі кәсіби түрде рәсімдеуге дайынбыз.
Егер Қазақстан өз кезегінде кедендік тарифтерді арттыру туралы шешім қабылдаса, онда Сіз белгілеген кез келген үстеме мөлшер қосымша түрде біздің 25% тарифімізге үстелетін болады. Бұл шаралар Қазақстан тарапынан бұрыннан келе жатқан тарифтік және тарифтік емес кедергілерге жауап ретінде қабылданып отыр. Мұндай кедергілер АҚШ-тың сауда тапшылығын тереңдетіп, ұлттық қауіпсіздігімізге қатер төндіруде.
Біз Сізбен сауда серіктесі ретінде ұзақ жылдар бойы бірлесе жұмыс істеуге мүдделіміз. Егер Қазақстан АҚШ үшін жабық сауда нарықтарын ашып, өз тарифтік және тарифтік емес шектеулерін алып тастаса, біз бұл 25 пайыздық тарифті қайта қарастыруға әзірміз. Бұл тарифтер болашақта елдеріміз арасындағы қарым-қатынасқа байланысты жоғары немесе төмен өзгеруі мүмкін.
Америка Құрама Штаттары Сізді ешқашан ұятқа қалдырмайды. Осы мәселеге көңіл бөлгеніңіз үшін алғыс білдіремін!
Ізгі тілектермен,
Дональд Дж. Трамп
Америка Құрама Штаттарының Президенті", – делінген Трамптың жолдауында.
