Көпшілікке айтыскерлігімен, кейінгі жылдары коуч ретінде де танылып жүрген қоғам қайраткері Мұхамеджан Тазабек белгілі мемлекет қайраткері Дінмұхамед Қонаевпен қалай таныс болғанын айтты. Бұл туралы ол журналист Жанар Байсемізге берген сұқбатында баяндады, деп хабарлайды Alash.kz.
Оның айтуынша, сол жылдары Қонаевтың шәкірті болған Берден Байқошқаров (Салтанат Байқошқарованың әкесі) саяси қысымға ұшырап, Су шаруашылығы министрлігінен ауыл шаруашылығына дейін төмендетілген. Ол ауылға келген соң тек қызметпен шектелмей, ауыл жастарының ішінен ерекше балаларды іздеген екен. Сол кезде жас Мұхамеджанды байқап, қасына ертіп, ақырында Қонаевтың алдына алып барған.
"13 жасымнан-ақ ақындығым байқалды. Ауылдағы наурыз мерекелерінде келіндердің бетін ашып, арнау айтып жүрдім. Атым шығып қалған. Байқошқаров ағамыз сол кезде мені көлігінен түсірмей, әр тойға апарып жүретін. Кейін Қонаевтың 80 жылдығына орай Алматыға алып келді. Қаламен таныстырып, Қонаев атамыздың үйіне кіргізді. Сол жерде батасын берді. Қазақ зиялыларына табыстап: "мына баланы қолдаңдар" деп аманаттап кетті", – деп еске алды ол.
Ақынның айтуынша, Қонаевтың үйінде үш күн қонақ болған. Бірінші күні – туыстар, екінші күні – зиялы қауым, үшінші күні – мемлекеттік қызметкерлер қатысқан үлкен дастархан жайылған.
"Үш күн бұрын ауылда қара ешекпен шөп тасыған мен, үш күннен кейін Қонаевтың қара уылдырық қойылған дастарханында арнау айтып отырдым. Фантастика сияқты көрінеді, бірақ солай болды", – дейді Мұхамеджан Тазабек.
Сол кездесуден кейін ол қазақтың үлкен ақындары мен қоғам қайраткерлеріне таныстырылып, шығармашылық жолы жаңа бағытта дамыған. Видеоға түсірілген сәттер кейіннен өз қолына түскенін де айтты.
"Мұндай мүмкіндік болмағанда мен аудандық газетте не облыстық айтыстарда ғана жүрер ме едім... Өмірде еңбек те, білім де маңызды. Бірақ ерекше биікке шығу үшін сәттілік керек", – дейді ол.
