Қаржаубай Нұрымов сот ісі аяқталғаннан кейін журналист Руслан Өтепбайға сұхбат берді, деп хабарлайды ALASH.KZ.
Stan.kz сөзіне қарағанда, қайғылы оқиға болған кезде отбасы қаржы жағынан қысылған.
Кәсіптері тоқтап, қарыздарын жаба алмаған. Айтбек Амангелдіге Қаржаубайдың туысы өтініш жасаған екен. Ал Шерзаттың әкесі бұл туралы білмепті.
— Айтбек басында қайғысы бар азамат болғандықтан, мені түсінеді деп ойладым. Дегенмен ол туралы, оның адвокаттары жайлы жаман ешнәрсе айта алмаймын. Жақсы адам жақсылық істейді, жаман адам жамандық істейді. Сот өтті. Енді айтқанмен пайда жоқ. Бірақ жақсы адам жарты жолда тастамайды деп ойлаймын. Олар “бәрібір адвокат таба алмай, қайта келеді” деп ойлаған болар. Бірақ Аллаға шүкір, Мейірман аға мен хабарласқанда, ол көмектесуден бас тартқан жоқ. Қолынан келгенше көмектесті. Соған ризамын, – деді Шерзаттың әкесі.
Сондай-ақ Қаржаубай Нұрымов Айтбек Амангелдінің командасындағы адвокаттарға шағымы жоқ екенін айтты.
— Ақмарал, Карина, Саида маған қолдау көрсетті. Оны жоққа шығара алмаймын. Олардың еңбегін бағаламау – қиянат. Ал Айтбекпен келіспеушіліктер болды. Ол мені қараласа да, ол туралы жақсы не жаман деп ештеңе айтпаймын. Әркімнің ісін халық өзі бағалайды ғой, – деді Нұрымов.
Сонымен қатар, Айтбек Амангелді бұл іске басқа адвокаттардың қосылуына қарсы болыпты, тек өз командасы ғана жауапты болады деген.
Шерзаттың өлімі бойынша істің тергеуінде бір ғана күдікті адам «Адам өлтіру» бабымен тергеліп, қалғандары «Бұзақылық» бойынша істі болып жатқанын Қаржаубай көпке дейін білмепті. Өз сөзіне қарағанда, мұны тек істі Мейірман Шекеев алған кезде білген екен.
— Айтбек Амангелдімен арақатынастың үзілуіне оның “өзі асылып қалды” деген сөзі әсер етті. Ол халыққа Нұрқанат асылып қалды деп айтты. Ол ондай ақпарат беретіндей тергеуші де емес, заңгер де емес. Туыстарым соған наразы болды. Ол кезде де “мүмкін, солай айту керек шығар” деп оларды тыныштандырдым. Кейін тағы да келіспеушіліктер болды. Алайда мен адвокаттарынан бас тартпадым, ресми түрде келісімшартты үзген жоқ едік, – деді Қаржаубай Нұрымов.
Нұрымов Нұрқанатты біреу өлтіріп кетті деп ойлайды. Алайда іс «Өзін-өзі өлтіру» ретінде жабылып қалған екен.
Бұған дейін Шерзаттың әпкесі отбасына ақпараттық шабуыл мен қаралау істері бойынша көмек сұрап, Мейірман Шекеевке өтініш жасаған. Алайда Шекеев Қаржаубайдың өзін хабарласуын күткен.
— Қаржаубайдың “іс сізге аманат” деген сөзі маған әсер етті. Ол басқа күдіктілердің “Бұзақылық” бабымен сотталайын деп жатқанын білмеген екен. Естіген кезде шок болды. Кейін істі екі команда бірігіп қолға алсын деп өтініш жасадым, құжаттарды сұрап, адвокаттарға жаздым. Алайда Саида да, Айтбек те жауап бермей қойды. Аз уақыт ішінде 62 томды оқу керек болды, – деді Шекеев.
Өз сөзінше, алғашында іс барлығына Қылмыстық кодекстің 99-бабы – «Адам өлтіру» бойынша қозғалған. Бірақ кейін тергеушілердің шешімімен бап өзгертілген.
— Айтсам, өз әріптестерім, алайда олар ашық түсіндіруге ниет білдірмеді. Сараптама бойынша өліміне пышақ сұғылғаны әсер еткен де, ұрып-соққаны жеңіл дәрежедегі зақым деп есептелген. Алайда іс «Кісі өлтіруге оқталу» деп саралануы керек еді, – деді ол.
