Қалың көпшілікке дәстүрлі әнші, өнертанушы, сценарист және режиссер ретінде жақсы таныс Ерлан Төлеутай актерлік қырынан танылып, Қырғызстанда өткен халықаралық фестивальде «Үздік актер» атанды, деп хабарлайды Alash.kz ұлттық порталы.
III Бішкек халықаралық кинофестивалінде режиссер Елзат Ескендірдің «Әбіл» фильмінде басты рөлді сомдаған Ерлан Төлеутай «Ең үздік актер» бәйгесін жеңіп алды. Халықаралық қазылар алқасының мүшелері – франциялық ARTE France Cinema компаниясының директоры әрі фестивалдің қазылар алқасының төрағасы Оливье Пере, италиялық атақты кинопродюсер Паола Марина Спина, бангладештік Дака халықаралық кинофестивалінің директоры Ахмед Мұстаба Замал, германиялық Cottbus кинофестивалінің директоры Бернд Будер, нидерландиялық Роттердам халықаралық кинофестивалінің бағдарламалық кураторы және киносыншы Евгений Гусятинский болды. Сыйлықты осы қазылардың ішінен суырылып шығып, Италиялық белгілі кинопродюсер Паола Марина Спинаның өзі тапсырды.
Құрметті Қырғыз елі! Осымен үшінші рет өткізіліп жатқан Бішкек фестивалі құтты болсын! Ұйымдастырушыларға алғысымды айтамын. Әлемнің түкпір-түкпірінен келген қазылар алқасына да рахметімді айтамын. Адамзатқа ортақ кино өнері жасай берсін. Қазақ-қырғыз бір туған халық, - деді Ерлан Төлеутай.
Естеріңізге сала кетейік, режиссер Елзат Ескендірдің «Әбіл» фильмі Францияда өткен 31-ші Везуль халықаралық Азия кинофестивалінде үш бірдей жүлде - Қазылар алқасының бас жүлдесі, Киносыншылар жүлдесі және NETPAC қазылар марапатына ие болды.
