Жалған ақпарат берген түрмедегі сотталушы сотталды

Мектепке жарылғыш зат қойылды деп түрмеден жалған хабар таратқан адамға үкім шықты, деп жазады Alash.KZ.

Талдықорғанда №71 мекемесінде жазасын өтеп жатқан Ж. есімді қылмыскер терроризм туралы жалған хабарлама таратқан. 

Аса ауыр қылмысы үшін 25 жылға сотталған Ж. 2024 жылы қарашада түзеу мекемесінде отырып 112, 103 және 102 шұғыл қызметтеріне қоңырау шалып, №25 орта мектепте және автовокзалда жарылғыш заттар қойылғаны туралы хабарлама жасап, автовокзалға жедел жәрдем бригадаларын жіберуді талап еткен.

Бұл нысандарды эвакуациялау және тексеру барысында жарылғыш заттар табылмаған.  

Сот оны ҚР ҚК-нің 273-бабы бойынша кінәлі деп танып, 2 жыл 6 айға бас бостандығынан айыру жазасын тағайындады, яғни өтеп жатқан мерзіміне тағы да 2,6 жыл қосылды.