Денсаулық сақтау министрі Ақмарал Әлназарова соққыға жығылған дәрігерлерге барып, хал-жағдайларын білді, деп хабарлайды ALASH.KZ.
Министр дәрігерлерге жасалған шабуыл салдарынан зардап шеккендердің жағдайы туралы айтты.
Оның мәліметінше, ақ халаттылар ауыр жарақаттар алған — ми шайқалуы, мұрын сүйектерінің сынуы, көптеген көгерулер мен гематомалар тіркелген.
“Қазіргі уақытта олар облыстық аурухананың шұғыл нейрохирургия бөлімінде жатыр, барлық қажетті медициналық көмек көрсетіліп жатыр. Бұл жай ғана бұзақылық емес — бұл өз өмірін басқаларды құтқаруға арнаған жандарға қарсы жасалған аса сорақы күш көрсету әрекеті. Мұндай агрессиялық көріністерге құқық қорғау органдары тарапынан қатаң шара қолданылып, қоғам тарапынан айыпталуы тиіс”, – деп жазды Ақмарал Әлназарова Instagram парақшасында.
Министр медициналық мекемелердегі қауіпсіздікті күшейту бойынша бірқатар шаралар жүзеге асырылғанын еске салды: бейнебақылау жүргізіліп жатыр, сондай-ақ медицина қызметкерлеріне қарсы күш қолданғандар үшін қылмыстық жауапкершілік күшейтілді. Алайда министрдің айтуынша, орын алған жағдай бұл шаралардың жеткіліксіз екенін көрсетіп отыр.
“Кеше Мемлекет басшысы дәрігерлерге арнаған сөзінде олардың қоғамдағы мәртебесі мен қауіпсіздігін қамтамасыз етудегі ерекше рөлін атап өтті. Алайда, өкінішке қарай, қоғамымызда әлі де болса медицина қызметкерлерінің жұмысына кедергі келтіріп, тіпті олардың өміріне қауіп төндіретін адамдар бар. Мұндай заңсыз әрекеттерге мүлде жол берілмеуі керек. Қоғамдық тәртіпті бұзған азаматтар заң аясында қатаң жауапқа тартылады”, – деп Президенттің сөзін мысал келтірді министр.
