Тұңғыш Президенттің жұбайы Сара Назарбаева қазіргі уақытта Алматыдағы ҚР Президенті Іс басқармасына қарасты Ұлттық госпитальда ем қабылдап жатыр. Бұл туралы Alash.kz тілшісі Dalanews.kz сайтына сілтеме жасап хабарлайды.
Аталған медициналық мекеме ел арасында "Совминка" атауымен белгілі. Госпиталь директоры Асхат Браловтың мәліметінше, Сара Алпысқызына қажетті барлық медициналық көмек көрсетілуде, ол білікті дәрігерлердің тұрақты бақылауында.
"Науқасқа тиісті емдеу шаралары бекітілген стандарттарға сай жүргізіліп жатыр", – деді Бралов.
Сонымен қатар, госпиталь басшысы пациенттің диагнозы мен нақты денсаулығы туралы ақпарат дәрігерлік құпия екенін, мұндай мәліметтер тек науқастың келісімімен немесе заң шеңберінде ғана жария етілетінін ескертті.
"Бұл шешім – науқастың жеке өміріне құрмет білдіру және емдеу процесіне сырттан ықпал етпеу мақсатында қабылданды", – деп түсіндірді Асхат Бралов.
