Колумбияда 14 жастағы жасөспірім президенттікке үміткердің өміріне қастандық жасап, оған оқ атты. Бұл туралы ALASH.KZ хабарлайды.
Қазір саясаткердің жағдайы өте ауыр, дәрігерлер нақты болжам жасай алмай отыр.
Кісі өлтіруге әрекет жасаған жасөспірімнің оқиғадан кейін не істейтінін алдын ала жоспарламағаны белгілі болды. Оны күтетін көлік те, мотоцикл де болмаған, ол аяқпен қашып құтылмақ болған.
Егер бұл әрекетті кәмелет жасына толған адам жасаған болса, заңсыз қару айналымы мен адам өлтіруге әрекет үшін Колумбияда 50 жылға дейін бас бостандығынан айырылуы мүмкін еді.
Алайда 14 жастағы күдіктіге, егер кінәсі дәлелденсе де, максимум 8 жыл ғана жаза берілуі мүмкін.
Қазір жасөспірім тергеуге көмектесуге келісіп, саясаткерді өлтіруге тапсырыс берген адамдар туралы ақпарат беретінін мәлімдеген.
Колумбиядағы президент сайлауы 2026 жылдың мамыр айына жоспарланған.
Сайлауалды науқан енді ғана басталды. Оққа ұшқан саясаткер Урибе Турбай негізгі фавориттердің қатарында болмаған, ол «Демократиялық орталық» партиясынан кандидат болғысы келген үміткерлердің бірі ғана еді.
