Ақтөбелік азамат Желтоқсан оқиғасына байланысты саяси қуғын-сүргін құрбаны деп танылды, деп хабарлайды Alash.kz
Ақтөбе қаласының 64 жастағы тұрғыны 1986 жылғы Желтоқсан оқиғасына қатысқаны үшін оқудан шығарылып, кейін өмір бойы қуғын-сүргінге ұшыраған.
Ол 1984 жылы Гурьев облыстық партия комитеті мен кәсіподақ жолдамасымен Қазақ мемлекеттік университетінің дайындық бөліміне түсіп, келесі жылы философия және экономика факультетінің студенті атанған. Алайда 1986 жылғы Желтоқсан оқиғасына байланысты құқық қорғау органдары күдікпен ұстағаннан кейін, екінші курстан шығарылған.
Осы оқиғадан кейін ол КОКП қатарынан шығарылып, жұмысқа орналасу мүмкіндігінен айырылған. Оның зайыбы да философия факультетін бітірсе де, отбасылық саяси «таңбаның» кесірінен еңбек жолында түрлі қиындықтарға тап болған.
1990–1993 жылдары отбасы әлеуметтік қиын жағдайда өмір сүріп, баспананы жалға алуға мәжбүр болған.
2025 жылы азамат сотқа жүгініп, өзінің қуғын-сүргінге ұшырағанын мойындауды талап етті. Ақтөбе қалалық №3 соты архивтік деректер мен куәгерлердің айғақтарын зерттей келе, арызданушының шынымен де Желтоқсан оқиғасына қатысып, саяси қуғын-сүргінге ұшырағанын растады.
Сот Азаматтық процестік кодекстің 306-бабына және «Жаппай саяси қуғын-сүргін құрбандарын ақтау туралы» Заңның 2-бабына сүйене отырып, арызданушыны саяси қуғын-сүргін құрбаны деп таныды.
Сот шешімі заңды күшіне енді.
