Халық әртісі Мақпал Жүнісова әлеуметтік желіде анасына тіл тигізген оқырманға ашуланды. Әнші тосыннан анасының шаңырағына қонаққа барған сәтін Instagram парақшасында бөліскен, деп Alash.kz ұлттық порталы ozgeris.info сайтына сілтеме жасап хабарлайды.
"Анамның үйіне айтпай барып, тосын сый жасадым. Аналарымыз аман болсын! Бауырларыммен қауышып, шай ішіп отырмыз", – деді өнер иесі.
Желі қолданушылары бейнеде дастархан басында ер азаматтар отырғанына қарамастан, батаны әншінің анасы бергенін қызу талқылады. Бірі мұны сынға алса, енді бірі ананың батасын қолдап, жылы пікір білдірді.
"Жесір әйел бата бермейтін еді", "Еркектер отырғанда әйелдің бата беруі дұрыс па?", "Бұл үйде шешесі басшы екені көрініп тұр", "Ананың батасы – ең қымбат", "Ананың тілегі қабыл болсын" деген түрлі пікірлер жазылды.
Халық әртісі анасын сынаған оқырманға жауап беріп, ренішін жасырмады.
"Не оттап отырсың?! Анасы ұл-қыздарына бата беруге болмайды дегенді бірінші естіп отырмын. Әкеміз өмірден озғалы анамыздың батасымен келе жатырмыз. 11 құрсақ көтерген анама қатын деуге хақың жоқ?! Нағыз есалаң сенсің", – деп ашуланды әнші.
