Танымал блогер Зарина Сапар «Қалаулым» бағдарламасының қатысушысы, журналист Айдос Игіліковпен қосылғаннан кейінгі көрген қорлығын айтты, деп хабарлайды ALASH.KZ Azattyq Rýhy сайтына сілтеп.
Ол өз сөзінде келін болып түскеннен кейін енесі пәктігін тексергенін де айтты.
«Мен ол үйге таза болып бардым. Сол кезде мені алып қашып кеткен соң оңтүстік жақтағы Степной деген ауылында таза екенімді көру үшін төсегімді тексерді. Бастапқыда намыстанып едім, енем келіп «жарайсың» дегенде абырой болып көрінді. Қазір ойласам біреудің төсегін тексеру деген ақымақтық қой.
Мен 10 желтоқсан күні келін болып түстім. Қаңтар айының басында жүкті болдым. Осы ретте айтарым қыздарға «мені кешірші» деп сүмірейіп келген еркекке сенбеңіздер. Мен сол эмоцияға беріліп, кешірдім. Қаңтарда ұрғаннан кейін кетіп қалған соң наурыз айында кешіріп, қайта қосылдым», - дейді Зарина Сапар.
Ол сөз арасында күйеуімен қайта қосылғаннан кейін карантин уақытына түсіп қалып, қайтадан қиындыққа тап болғанын айтты.
«Ол кезде карантин басталған, ешкім ешқайда бара алмайды. Жатақхананың тар әрі өте жаман бөлмесінде тұрдық. Мен әдемі пәтерге апар деген жоқпын. Бәріне шыдадым. Ол мені жатақхана бөлмесіне тастап, телефонымды алып кететін, жейтін ешнәрсе әкеп бермейтін. Аяғым ауыр болғандықтан тамақ ішкім келеді. Көршінің телефонымен анама хабарласқанымда дүкенге барып, алатыныңды алып, маған қайта телефон соқ дейтін. Бар алатыным сонда 1500 теңгенің нәрсесі. Соны анам төлейді.
Сондай күндердің бірінде жатақхана бөлмесінде оған пирожки пісіріп беріп отырғамын. Сонда әке-шешемді сөзбен қорлай бастады. Сол кезде ғана қарсы шығып, дауыс көтердім. Қолындағы телефонын лақтырғанда тимей қалған. Содан мені артқа итеріп жібергенде пісіріп тұрған тамағыма құладым. Белім ыстыққа күйіп қалды. Содан шыдамай бетінен табақпен ұрып жіберіп, дастархан үстіндегі пышақты алдым, «не сен өлесің, не ішімдегі баламен мен өлемін» деген ой келді», - деп басынан өткен қорқынышын еске алды.
