Көпке белгілі профессор, ұстаз Кәкен Қамзин өзінің басынан өткерген қиын жағдайдан ел алдына алғаш рет шығып сөз айтты, деп жазады Alash.kz.
Шілде айының басында ұстазды белгісіз біреулер алдап, үйін сатып, ақшасын үшінші тұлғаларға беруіне себепші болған.
"Ауыр психологиялық соққыдан есімді енді ғана жинадым. Менің басыма түскен жағдайды әлеуметтік желідегі жазбалардан көпшілік тегіс хабардар болар. Кибералаяқтардың шырмауына түсіп қалғаным рас. Мамандардың айтуынша, қылмыскерлер тек цифрлық технологияларды ғана емес, психологиялық әсерді, гипноз әлеуетін және әртүрлі мекемелердегі жалдамалыларының деректерін керемет ұшқыр қолданатын көрінеді. Қазір құқық қорғау органдары бұл мәселені жан-жақты тексеріп жатыр. Айтылатын да, айтылмайтын да нәрселер бар. Дәл осындай зауал дәп өз басыма түседі деп кім ойлаған. Іштей Алладан бұдан кейін де өмір таусылмас, жүрекке жігер, бойға қуат бер деп тілеп жүрмін. Енді нақты фактіні жайып салсам, 1983 жылдан бері тұрып келе жатқан, бала-шағамды өсірген баспанамнан айрылғалы отырмын. Бірсыпыра жан шын ниетімен жанашырлық білдіріп жатыр. Әсіресе шәкірттерім. Оларға мың да бір рахмет. Адамгерліктің көрсеткіші, адамгершіліктің тесті осы емес пе? Бұл жазбаны сіздерге сабақ болсын, ақпараттық алаңдағы көлбеңдеген, жарқыраған жазбаларға көп сене бермеңіздер деген ниетпен жариялап отырмын. Аман болыңыздар, ағайындар!
