30 шілде күні таңертең Камчатка жағалауынан 161 шақырым қашықтықта қуаты 8,5 балл болатын жойқын жер сілкінісі болды. Бұл – соңғы онжылдықта өңірде тіркелген ең күшті зілзала. Бірқатар елдерде цунами қаупіне байланысты ескерту жарияланды, деп жазады Alash.kz.
РБК-ның мәліметінше, бастапқыда сейсмологтар жер сілкінісінің қуатын 7,5 балл деп бағалаған, алайда кейін бұл көрсеткіш 8,5 баллға түзетілді. Жерасты дүмпулері 32 шақырым тереңдікте орын алған.
Еуропа-Жерорта теңізі сейсмологиялық орталығы (EMSC) зілзаланың қуатын 8,7 балл деп көрсетіп, кейінгі жер асты қозғалыстары 7,0 және одан төмен болғанын хабарлады.
Камчатка өлкесінің Төтенше жағдайлар басқармасының деректеріне сәйкес, жағалауға биіктігі 32 см-ге дейін жететін цунами толқындары соғуы мүмкін. Мұндай толқындар Алеут муниципалды округіне, Усть-Камчатскийге (20 см-ге дейін), ал Петропавл-Камчатскийге 6 см-ге дейін жетуі ықтимал.
Төтенше жағдайлар министрлігі тұрғындарды жағалаудан аулақ болуға және цунамиді көруге тырыспауға шақырды. Сондай-ақ рейдте, шығанақтарда немесе айлақтарда тұрған кемелерге ашық теңізге шығу ұсынылды.
Камчатка губернаторы Владимир Солодов бұл оқиға соңғы онжылдықтағы ең қуатты жер сілкінісі екенін атап өтіп, өзінің Telegram арнасында арнайы қызметтердің әлеуметтік маңызы бар нысандарды, соның ішінде мектептерді, ауруханаларды және балабақшаларды тексеруге кіріскенін хабарлады.
