Медицина қызметкерлеріне қарсы жасалатын зорлық-зомбылық әрекеттері енді заң жүзінде қатаң қадағаланады. Мемлекет басшысы Қасым-Жомарт Тоқаев дәрігерлерге күш қолдану мен шабуыл жасау деректеріне қатысты жазаны күшейтуді тапсырды. Бұл туралы Ақорда хабарлады, деп жазады Alash.kz.
Президенттің мәлімдеуінше, адам өміріне араша түсетін ақ халатты абзал жандардың қауіпсіздігі – бүкіл қоғамның тұрақтылығы мен адамгершілік қағидаларының көрінісі. Сондықтан дәрігерлердің өмірі мен денсаулығына қауіп төндіретін кез келген әрекетке заң жүзінде батыл тосқауыл қойылуы тиіс.
Мемлекет басшысы ұлттық заңнамаға тиісті өзгерістер енгізу туралы Парламент депутаттары, медицина саласының өкілдері мен белсенді азаматтардың ұсынысын қолдады. Осыған байланысты Үкіметке заңнамалық түзетулер әзірлеу тапсырылды. Жаңа бастама азаматтық қоғам өкілдерінің қатысуымен Парламентте жан-жақты талқыланбақ.
Осыған байланысты Мәжіліс депутаты Асхат Аймағамбетов те пікір білдіріп, бұл тапсырманың маңыздылығын атап өтті.
"Адам өмірін құтқаратын дәрігерлерге зорлық көрсету – бүкіл қоғамға жасалған шабуыл. Сондықтан енді мұндай әрекеттерге заң жүзінде нақты тосқауыл қойылады деп сенеміз," – деді ол өзінің әлеуметтік желідегі парақшасында.
Оның айтуынша, депутаттар бұл бағытта арнайы заң нормаларын әзірлеп, Үкіметтің қарауына жолдаған. Енді алдағы сессияның басында нақты нәтижелер болуы тиіс.
