Қазақстандық боксшы Құралай Егінбайқызы Азия чемпионы атанды, деп хабарлайды Alash.kz.
Таиланд астанасы Бангкокта өтіп жатқан жастар арасындағы (U19) Азия чемпионатында Қазақстан құрамасы алғашқы алтын медальға қол жеткізді.
80 келіге дейінгі салмақ дәрежесінде ел намысын қорғаған Құралай Егінбайқызы финалда үндістандық Критика Васанмен кездесіп, тартысты жекпе-жекте жеңіске жетті.
Алғашқы раундта қарсыластар тең дәрежеде өнер көрсетті. Алайда кезең соңында үнді спортшысына жекпе-жек тоқтаған сәтте соққы жасағаны үшін ескерту беріліп, бір ұпайы шегерілді. Соған қарамастан, раунд Васанның пайдасына жазылды.
Екінші раундта Құралай қарсыласын канатқа тықсыра түсіп, басымдық алуға тырысты. Үнді боксшысы шегініп жүріп дәл соққыларын тигізгенімен, Егінбайқызы бірнеше сәтті шабуыл ұйымдастырып, кезеңді өз есебіне жаздырды.
Шешуші кезеңде Құралай физикалық тұрғыдан сергек көрініп, айқын басымдық танытты. Төрешілердің бөлек шешімімен алтын медаль Қазақстан спортшысына берілді.
Сондай-ақ, 57 келі салмақта сынға түскен Аяжан Ермек күміс жүлдегер атанды. Финалда ол үндістандық Мусканға 3:2 есебімен жол берді.
