Белгілі театр актрисасы, көптің көңілінен шыға білген әзілкеш Жұлдызай Дүйсенбиева әлеуметтік желілер мен театрдың арасында таңдау жасағанын мәлімдеді, деп жазады Alash.kz.
Өнер жұлдызы бұл туралы AINUR ASANBERDI YouTube арнасына берген сұхбатында толық баяндады. Оның айтуынша, әлеуметтік желідегі елдің ықыласы халықпен жүзбе-жүз кездесіп, өнер көрсеткенге мүлде жетпейді. Алдараспан театрының 15 жылдық мерей тойында 1,5 ай гастрольде жүріп осыны ұққан әзілкен әлеуметтік желідегі парақшасын өшіріп тастаған.
Сахнаның әдемі бір сәнін, тәттілігін қайтып сезініп келдім ғой. Инстаграмдағы көрермендерді көрмеймін ғой. Олардың аттары ғана жазылып тұрады. Халықтың қошеметі мен шапалағын қайтадан көрдім ғой. Ол нәрсені тоқтатып тастадым да, кәсіби әртіспін ба, әртіс болып қаламын деп шештім.
Жұлдызай Дүйсенбиева бұған дейін Instagram желісінде өте белсенді болған. Тіпті, танымал кәсіпкерлерден жарнама қабылдап, күлкілі вайндар да түсірген. Осы еңбегі үшін алған қаражатына үй, көлік те алған. Алайда, актриса бұдан кейінгі жолын әлеуметтік желіден мүлдем көрмейтін сияқты.
Шүкір! Қанағат! Болды сол жетеді. Өнердің арқасында көбейтерміз. Инстаграмда да мен блошер емеспін ғой. Маған жазылған адамдар сол өнерім үшін жазылды ғой. Өнердің арқасында келіп жатқан кішкентай болса да табысым ғой.
Өмірін мен өнеріндегі жаңа бетбұрысқа қалай келгенін айтқанда, Жұлдызай Дүйсенбиева мұны “қанағатшылдық” пен “ішкі түйсікке” балады.
Мен қатты қанағатшыл адаммын. Шүкір деймін болды. Сосын мен ішімдегі екінші Жұлдызайды қатты тыңдайтын адаммын. “Тоқта” десе тоқтаймын. “Жүр” десе жүремін. Рухани жағынан күшті болып келгеннен кейін қатты қызық болып тұрған жоқ.
