Қазақстанның Еңбек және халықты әлеуметтік қорғау министрі Светлана Жақыпова Мәжіліс кулуарында аутизмі бар балаларды өлтіруге үндеген блогердің сөзіне байланысты өз ұстанымын білдірді, деп хабарлайды Alash.kz.
Бұған дейін әлеуметтік желіде бір блогер аутизмі бар балаларды “не емдеу, не өлтіру керек” деген мазмұндағы жазбасын жариялаған болатын.
"Бұл пікірді өз басым қолдамаймын. Мұндай жағдайлар мен көзқарастарға жол берілмеуі тиіс. Біз инклюзивті қоғам құрып жатырмыз және мүгедектікке байланысты ешқандай кемсітушілікке жол бермейміз", – деді министр.
Светлана Жақыпованың айтуынша, ерекше қажеттіліктері бар балалар мемлекет тарапынан бірнеше министрліктің – Оқу-ағарту, Еңбек және Денсаулық сақтау министрліктерінің тұрақты бақылауында.
"Біз бұл балаларды толық қолдап келеміз. Ал блогерге қатысты құқық қорғау органдары ең дұрыс әрі ең қатаң шешім қабылдайды деп ойлаймын", – деп қосты ол.
Еске салсақ, бұған дейін блогер Райхан Жұмамуратова әлеуметтік желідегі парақшасында даулы жазба жариялаған. Осыған байланысты Алматы қаласының полиция департаменті аутизмі бар балаларға қатысты жеккөрушілікке шақыру фактісі бойынша қылмыстық іс қозғаған болатын.
