Қазақстанда жекеменшік білім беру секторының белсенді дамуына байланысты Білім беру министрлігі тарапынан бұл мектептерге қойылатын талаптар күшейтілмек. Бұл жөнінде вице-министр Еділ Оспан "Курсив" басылымына берген сұқбатында айтты, деп хабарлайды Alash.kz.
Министрлік мәліметіне сүйенсек, соңғы жылдары жекеменшік мектептерде бірқатар заңбұзушылықтар жиілеп кеткен. Атап айтқанда, білім сапасының төмендігі, мұғалімдердің кәсіби деңгейінің жеткіліксіздігі, қаржыландыру мәселесіндегі заңсыздықтар және ата-аналарға мемлекеттік тапсырыс туралы деректердің ашық берілмеуі секілді проблемалар анықталған.
"Мемлекеттік мектептерде білікті педагогтардың үлесі орта есеппен 77% болса, жекеменшік мектептерде бұл көрсеткіш – шамамен 41%. Кейбірінде бұл деңгей 20-30%-дан аспайды. Бұл тікелей білім сапасына әсер етеді", – деді вице-министр.
Сонымен қатар, PISA халықаралық зерттеуінің нәтижелері де жекеменшік мектеп оқушыларының негізгі пәндер бойынша артта қалғанын көрсетіп отыр. 2018 жылы оқу сауаттылығы бойынша 13 баллға, ал 2022 жылы математикалық сауаттылық бойынша 18 баллға төмен нәтиже тіркелген.
Вице-министрдің айтуынша, жекеменшік мектептердің 40%-ы жалға алынған ғимараттарда орналасқан. Бұл өз кезегінде қауіпсіздік пен инфрақұрылым тұрғысынан белгілі бір тәуекелдерді тудырады. Осыған байланысты лицензиялық талаптарға өзгеріс енгізу жоспарланып отыр – яғни, алдағы уақытта жалдамалы ғимараттарда мектеп ашуға рұқсат берілмейді.
Мемлекеттік білім беру тапсырысын бөлу тәртібі де қайта қаралып, жаңа критерийлер енгізілмек. Ата-аналар төлейтін ең жоғарғы оқу ақысы енді мектептің нәтижесі мен ұстаздардың кәсіби деңгейіне қарай анықталады.
Жаңа мөлшерлемелер төмендегідей бөлінеді:
- Халықаралық мектептер үшін – 2400 АЕК (шамамен 9,4 млн теңге);
- Кемінде 25% "педагог-эксперт" санаты бар және олимпиада жеңімпаздары бар мектептер үшін – 1200 АЕК (шамамен 4,7 млн теңге);
- Қалған жекеменшік мектептер үшін – 250 АЕК (шамамен 983 мың теңге).
Аталған өзгерістер толықтай 2026 жылдан бастап күшіне енеді. Ал 2025 жылы бұрынғы тәртіп сақталады, бірақ мектептерге бір жыл бейімделу мерзімі беріледі.
Еділ Оспанның айтуынша, мемлекет алдағы уақытта сапалы білім беретін, заң талаптарын орындайтын және оқушылардың құқығы мен мүддесін бірінші орынға қоятын жекеменшік мектептерді ғана қолдауды жалғастырады.
