Тараз қаласының тұрғыны Аңсагүл Қасымова ұлы Нұржігіт Жолшыбектің қайғылы өліміне себеп болғандардың әлі жазаланбай отырғанына ашынып, жанайқайын жеткізді. Оның айтуынша, 18 жастағы баласын бір топ бұзақы аяусыз ұрып, пышақтап кеткен, деп Alash.kz ұлттық порталы Almaty.tv сайтына сілтеме жасап хабарлайды.
Марқұм Нұржігіт Жолшыбектің анасы ұлының жұмыстан үйге қайтып келе жатқанда, бейтаныс адамдардың шабуылына ұшырағанын айтты. Әйел адамның сөзінше, шабуыл жасағандар өзара кек үшін Нұржігітті кездейсоқ құрбан еткен.
"Белгісіз бесеуі басқа бір жәбірленушімен ұрсысып, араларында конфликт болып қапты. Сөйтіп олар барғанда 3 досын жинап, ақылдасып, шақырып, пышағын алып келген. Менің балам 3 қызбен, ана екеуі артында келе жатқан. Менің баламды танымаса да, пышақтап тастаған ғой. Бесеуі бес жақтан тепкілеп, тістеріне дейін сындырып тастаған", – деді марқұмның анасы Аңсагүл Қасымова.
Қан жұтып отырған ана тергеу ісінің созылып кеткеніне де наразы. Оның айтуынша, оқиға сәті бейнебақылау камераларына анық түсіп қалғанымен, кейбір бейнежазбалар тергеу материалдарына тіркелмеген.
"Барып санадық, 23 камера бар екен. Сол тергеуші видеоны тіркемеген ғой. Арғы жағындағы түсірген бейнематериал тіркеген. Ал бергі жақтағы "Сергекке" түскендері жоқ. Киімдерін көрсетті, тілгілей берген, 6 ағзасын кесіп кеткен", – деп күйінеді марқұмның анасы.
Бұл іс Алматы қаласының қылмыстық істер жөніндегі мамандандырылған ауданаралық сотында қаралған. Сот үкіміне сәйкес, бір адам қасақана адам өлтіру бабымен 20 жылға, қалған төртеуі қоғамдық тәртіпті бұзу бойынша 3,5 жылға бас бостандығынан айырылған. Алайда бұл үкім әлі заңды күшіне енбеген.
Себебі айыпталушы тарап апелляциялық шағым түсіріп, істің қайта қаралуын талап еткен.
"Сот үкімі әлі заңды күшіне енген жоқ. Заңда белгіленген мерзім ішінде үкімге қатысты апелляциялық шағымдар келіп түсті. Осыған байланысты іс қазіргі уақытта Алматы қалалық сотының қылмыстық істер жөніндегі сот алқасында апелляциялық тәртіппен қаралып жатыр. Апелляциялық инстанция шешім шығарғаннан кейін, қосымша ақпарат беріледі", – деді Алматы қалалық сотының баспасөз қызметі.
Ал Нұржігіттің анасы алғашқы сот шешімін әділ деп санайды. Алайда іс қайта қаралса, кінәлілердің жазадан жеңіл құтылып кетуінен қауіптенеді.
