Шымкентте қала әкімінің орынбасары Руслан Берденовке жасалған қастандыққа қатысты сот процесі басталды. Бұл іс бойынша айыпталушы Ернар Жиембай кінәсін жартылай мойындады, деп Alash.kz ұлттық порталы Tengrinews.kz сайтына сілтеме жасап хабарлайды.
Сот отырысы басталар алдында Ернар Жиембай тілшіге өзіне тағылған айыптар жөнінде пікір білдірді.
"Қылмыс жасауға оқталу деп айыптап жатыр. Бірақ нақты бап әлі анықталмады. Өлтіргім келмеді. Қазір 8 жылдан 12 жылға дейін жазаны қарастыратын бап бойынша айып тағылып отыр", – деді ол.
Сот отырысында судья Әбінұр Қарабаев айыпталушыға кінәсін мойындай ма деп сұрақ қойды.
"Кінәмді мойындаймын. Мақсатым – қорқыту болды. Адам өлтіру немесе денсаулыққа зиян келтіру ниетім болмады. Айыптың қазіргі квалификациясымен келіспеймін", – деп жауап берді Ернар Жиембай.
Ол Қылмыстық кодекстің 24-бабының 3-бөлігі және 99-бабының 1-бөлігі ("Адам өлтіруге оқталу") бойынша айыпталуда.
