Түркістан облысының кәсіпкері, Арыс қаласының тұрғыны Олжас Сансызбайұлы бүкіл Түркістан мен Арыс халқы атынан Димаш Құдайбергенге ерекше құрмет көрсетіп, қазақтың дәстүрлі сыйы – ақ түйе мінгізді, деп хабарлайды Alash.kz
Кәсіпкер халық атынан сөйлеп:
«Димаш інімізге Түркістан халқы, Арыс халқы атынан қос өркешті түйені сыйлап жатырмыз. Құдай қаласа ініміз қай жерде болса да, аспанда да, жерде де жолы болсын. Алла тағала осындай ұлды қазаққа сыйлаған әке-шешесіне, ата-апасына миллион алғыс. Дәстүріміздің әр нүктесіне дейін ұстап жүрген осындай азаматымыз барына қуанамын», – деді.
Өз кезегінде Димаш та халыққа ризашылығын білдірді:
«Ең бастысы – халыққа тағзым етіп, сәлем беріп кету еді. Түйенің үстіне мініп алдым енді, көңілдеріңізді аттап кете алмадым, рахмет. Аман болыңыздар, еліміз аман болсын», – деді ол.
Бұл сәттің видеосы әлеуметтік желіде кеңінен таралып, қалың көпшілік жылы пікірлерін қалдырды.
«Қазағымды әлемге танытқан Димаш балама не сыйласа да, әрбір құрметке лайықты. Димаш баламды Алла тіл-көзден сақтасын», – деген сынды қолдау пікірлер көптеп жазылды.
