Мәжіліс депутаты Ардақ Назаровтың Парламент мінберінен анасын 70 жасымен құттықтауы қоғамда қызу пікірталас туғызды. Әлеуметтік желіде бұл қадамды біреулер жылы қабылдаса, енді біреулер депутаттың уақытты тиімді пайдаланбағанын сынға алды, деп хабарлайды Alash.kz
Сын айтқандардың қатарында танымал ММА спортшысы Қуат «Найман» Хамитов та бар. Ол қазіргі жағдайда депутаттардың басты назарын халықтың әлеуметтік-экономикалық мәселелеріне аударуы қажет екенін алға тартты.
«Ардақ аға анасын туған күнімен құттықтап, ел арасында қызу талқылау туғызды. Бірақ дәл қазіргі кезде мұндай әрекеттердің уақыты емес. 2010 жылдан бері халықтың жағдайы айтарлықтай жақсарған жоқ. Жұмыссыздық, қарыз мәселесі әлі күнге дейін бар. Бүгінде ұйықтайтын емес, елдің дамуы үшін күресетін кез. Парламентте халыққа пайдасы бар, нақты жұмыс істейтін адамдар ғана қалуы тиіс. Ал өз үлесін қоса алмайтындар орнын босатқан жөн», – деді спортшы.
Өз кезегінде Назаров қоғамдағы сынға әлеуметтік желідегі жазбасымен жауап қатты. Депутат бұл әрекеттің басты мақсаты – жастарға ата-анаға құрмет көрсетудің маңызын жеткізу екенін түсіндірді. Сонымен бірге ол елімізде бұдан да маңызды мәселелер бар екенін атап өтті.
«Мәселе – Парламент төрінде құттықтағанымда емес. Мәселе – қайда жүрсең де, қандай қызмет атқарсаң да ата-анаңды құрметтеуді ұмытпауымызда. Бірақ елімізде бұдан да өзекті мәселелер бар: ажырасулар, тастанды балалар, маскүнемдік пен нашақорлық. Біз осыған алаңдауымыз керек», – деді Назаров.
Әлеуметтік желі қолданушылары арасында да пікір екіге жарылды: бір бөлігі депутаттың әрекетін мәдениет пен отбасылық құндылықты насихаттау деп бағаласа, екінші бөлігі Парламент мінбері жеке құттықтауларға арналмағанын алға тартып отыр.
