Жамбыл облысы, Шу ауданы, Құмқайнар ауылында қайғылы оқиға орын алды. Мектепаралық футбол ойынынан кейін 10-сынып оқушысы көз жұмды, деп хабарлайды Alash.KZ.
Полиция мәліметінше, оқиға 12 қыркүйекте орын алған. Ойыннан кейін 10-сынып пен 11-сынып оқушылары арасында жанжал туындаған. Матч нәтижесіне наразы болған жоғарғы сынып оқушысы кіші сынып оқушысына шабуыл жасап, аяусыз ұрған. Жасөспірім алған жарақатынан дәрігерлер келмей жатып қайтыс болған.
Қазіргі таңда тергеу аясында 16 және 17 жастағы екі жасөспірім ұсталып, уақытша қамау изоляторына жабылды. Іс бойынша қажетті тергеу амалдары жүргізіліп, сараптамалар тағайындалды.
Жағдайды жергілікті билік органдары бақылауына алды. Балалар құқығы жөніндегі уәкілдің қатысуымен арнайы комиссия құрылды. Мектеп оқушыларымен профилактикалық әңгімелер жүргізіліп, марқұмның отбасына қолдау көрсетілуде.
