АҚШ президенті Дональд Трамп Ресейге қарсы жаңа санкциялар енгізуге дайын екенін мәлімдеді. Ол мұндай шара тек НАТО елдері ресейлік мұнайдан толық бас тартқан жағдайда ғана жүзеге асатынын атап өтті, деп хабарлайды Alash.KZ.
Мемлекет басшысы одақтас елдердің бір бөлігі әлі күнге дейін Ресейден мұнай сатып алып отырғанын сынға алды. Оның айтуынша, бұл АҚШ-тың келіссөздердегі ықпалын әлсіретіп, Мәскеуге қысым жасау мүмкіндігін шектейді.
Трамп өзінің жазбасында “Мен дайынмын, қашан сіздер дайын болсаңыздар” деп жазды.
Президенттің пікірінше, егер НАТО ұсынылған талаптарды орындаса, қақтығыс қысқа мерзімде тоқтап, мыңдаған адамның өмірі сақталады. Ал керісінше жағдайда АҚШ-тың уақыты мен қаржысы босқа кететінін ескертті.
Сонымен қатар Трамп Қытайға қатысты да ұстанымын білдірді. Ол Пекиннің Мәскеуге ықпалын шектеу үшін Қытайдан келетін тауарларға 0-ден 100 пайызға дейін тариф енгізуді ұсынды. Бұл бастама АҚШ-тың Қытайға қарсы экономикалық қысымын күшейтуі мүмкін.
Халықаралық сарапшылар Трамптың бұл мәлімдемесін Вашингтонның қатаң сыртқы саясатының белгісі деп бағалап отыр. Егер НАТО елдері ортақ шешімге келіп, мұнай импорты мәселесінде нақты қадам жасаса, бұл Ресей экономикасына елеулі соққы болып тиюі ықтимал. Ал Қытайға қатысты тарифтер жаһандық сауда жүйесінде жаңа шиеленістерді өршітуі мүмкін.
