Астанада бұрын-соңды болмаған алаяқтық оқиға қоғамды дүр сілкіндірді. Гүлмира Ашимова есімді әйел әріптестерін алдап, “ұлым терезеден құлап, ауыр халде жатыр” деп жалған ақпарат таратып, 2,5 миллион теңгеден астам қаржыны иемденген, деп хабарлайды Alash.KZ.
Желі қолданушысы Мадинаның айтуынша, 25 тамыз күні Гүлмира әріптестеріне “балам төртінші қабаттан құлап кетті, ертесі күні комаға түсті” деп хабарлаған. Кейіннен “ұлының сүйектері сынғанын, көкбауырын алып тастағанын, бірнеше ота жасалғанын” айтып, көз жасын көлдетіп, ақша сұрай бастаған.
“Біз бәріміз сендік. Қазақстан, Қырғызстан, Ресейдегі әріптестері қаржы жинады. Бірде ол баласына 8 сағатқа созылған ота жасалды десе, бірде зонд арқылы тамақтандырып жатыр деді. Соңында 5 қыркүйекке қараған түні “ұлым қайтыс болды” деп хабарлады. Жерлеуге тағы ақша жинай бастады. Сол кезде бізге тіпті мәйітті ашып, сараптамаға апарды деп айтты. Бұл – нағыз арсыздық” – дейді жәбірленушілердің бірі.
Алайда көп ұзамай шындық ашылды. Гүлмираның күйеуімен сөйлескен әріптестері қайтыс болды деген Әмірдің сабаққа барып жүргенін, ал әйелдің өзі сұлулық салонында жұмыс істеп жүргенін білген. Барлық өтірік әшкере болғанда, ол әріптестерінен “ешкімге айтпаңдар, бәрін түсіндіремін” деп жалбарынған.
Әріптестердің айтуынша, жиналған ақша оның күйеуінің жеке кәсіпкерлік шотына түсіп отырған. “Адамдардың сенімімен ойнауға болмайды. Біз қанша күн бойы бала үшін жылап, уайымдадық. Мұндай қадамды ақтап алуға келмейді” – дейді олар.
Stan.kz тілшісіне жәбірленушілердің бірі Ләззат берген мәліметке сүйенсек, қазір полиция қылмыстық кодекстің 190-бабы, 2-бөлігі (“Алаяқтық”) бойынша іс қозғап, тергеу жүргізіп жатыр. Жәбірленушілердің саны – шамамен жүзге жуық, ал келтірілген шығын 2,5 миллион теңгеден асып отыр.
Тағы бір назар аударарлық жайт – алдап соққан Гүлмира Ашимованың Ұлттық ұландағы подполковниктің әйелі екені белгілі болды. Жәбірленушілер оған заң алдында әділ жаза берілуін талап етуде.
