Бокс тарихындағы қазақтан шыққан тұңғыш Олимпиада чемпионы Бекзат Саттархановтың өмірі мен жүріп өткен жолы туралы жазушы Бейбіт Сарыбайдың "Бекзат. Шаршы алаңнан тыс өмір" атты кітабының тұсауы кесілді. Салтанатты іс-шараға Түркістаннан арнайы келген чемпионның анасына Абай облыстық бокс федерациясының президенті, "Beles" құрылыс компаниясының бас директоры Махат Төреәлі пәтер кілтін табыстады, деп хабарлайды Alash.KZ.
Сидней төріндегі шаршы алаңда атой салған қазақтың қайсар ұлы туралы кітаптың лентасы Астанадағы Бекзат Саттарханов атындағы 9000 шаршы метрлік заманауи спорт кешенінде қиылды. Тұсаукесерге елге белгілі кәсіпкерлер, жазушылар, Саттархановпен бірге қолғап түйістірген жора-жолдастары арнайы келіп қатысты. Небәрі 20 жасында қазақтың маңдайына сыймай кеткен чемпион ұлды өмірге әкелген алтын құрсақты анаға алғысы мен ақ тілегін жаудырған жұрт атынан белгілі кәсіпкер өзі басқарып отырған компаниясы атынан қомақты сый жасады. Сондай-ақ, қолы ашық жандар кітап авторы Бейбіт Сарыбай мен екі дүркін олимпиада жүлдегері Болат Жұмаділовке жағалы киім жапты. Бұл туралы Махат Төреәлі өз парақшасында жазды.
"Анамызға құрмет - батырға құрмет!
Бүгін әулетіміздің және компаниямыздың атынан батырымыздың анасына пәтер кілтін табыстадық.
Бекзат Саттарханов атындағы кешенінде “Бекзат.Шаршы алаңнан тыс өмір” атты жазушы Бейбіт Сарыбайдың кітабының тұсаукесері өтті. Бұл кітап арманнан туындаған, батыр Бекзаттың тұлғасын өскелең ұрпаққа үлге ететін туынды. Ағамыздың рухы шат болғай!" - деді ол.
Абзал ананың мұндай құрметке бөленгеніне қуанған жұрт кәсіпкерге алғысын айтып жатты:
Бекзатты туған ананы ұлықтағаныңыз үшін сізге үлкен рақмет! Жамандық көрмеңіз, аға!
