АҚШ президенті Дональд Трамп саясаткер Чарли Кирк өліміне қатысты мәлімдеме жасады. Ол консервативті комментатор Чарли Киркті өлтірді деген күдікпен 22 жастағы Юта штатының тұрғыны Тайлер Робинсон ұсталғанын мәлімдеді, деп жазды Alash.KZ.
BBC жазуына қарағанда, 22 жастағы күдіктіні полицияға өз әкесі тапсырған.
«Бұл іске оған ең жақын адам көмектесті. Ол – оның әкесі», – деді Трамп
CNN және ABC телеарналары күдіктінің әкесі алдымен ұлын берілуге көндіргенін атап өтті. Кейін жастар шіркеуінің қызметкерімен хабарласқанын жазып, АҚШ маршалдары қызметіне ақпарат бергенін нақтылады.
Юта штатының губернаторы Спенсер Кокс та арнайы баспасөз мәслихатын өткізіп, күдіктінің туыстарына алғыс айтты.
«Олар дұрыс қадам жасады. Өз баласын полицияға алып келу оңай шешім емес, бірақ олар әділетті таңдады», – деді ол.
Трамп бастапқыда тергеушілердің қолында ешқандай нақты дәлел болмағанын айтады:
«Біз тек видеодан бастадық. Онда күдікті құмырсқа секілді ғана көрінді. Бірақ адам жүргенін байқадық», – деді Трамп.
Сондай-ақ ол Чарли Кирктің өліміне қатысты қатты қайғырып отырғанын жеткізді. Егер сот Робинсонды кінәлі деп тапса, оны өлім жазасына кесуге үміттенетінін айтты.
Трамп Киркті «өзінің ұлындай» көргенін, оның TikTok жобаларында үлкен көмек көрсеткенін де ерекше атады. Президент серігінің жерлеу рәсіміне қатысатынын айтып, оның өлім сәтін түсірген видеоны қараудан бас тартқанын жеткізді.
Еске сала кетейік, АҚШ-тағы Юта штатының Utah Valley университеті кампусында саяси белсенді әрі Трамптың жақтасы Чарли Киркті көптің алдында сөз сөйлеп тұрған кезінде атып кеткен еді.
