Түрікменстанда ел президенті Сердар Бердімұхамедовке "сұлтан" атағын беру ұсынысы айтылды. Сонымен қатар, бүкіл Бердімұхамедовтер әулетін "мәңгілік шаһтар" деп жариялау бастамасы көтерілді. Бұл туралы Alash.kz тілшісі Minval.az басылымына сілтеме жасап хабарлайды.
Аталмыш бастама маусымның 29-ы күні жаңадан бой көтерген Аркадаг қаласында елбасы, "Ұлт көшбасшысы" Құрбанқұлы Бердімұхамедовтің туған күніне арналған салтанатты жиында жария етілді. Іс-шара барысында Түрікменстанның халық әртісі Джемал Сапарова:
"Тұрыңдар, Сердарға бас иіңдер! Ол мәңгі патша болсын, оны сұлтан етіп тәж кигізіңдер!" – деген жолдары бар ән орындаған.
Кейін бұл әнді мемлекеттік "Аркадаг" телеарнасы көрсетіп, композиция елге кеңінен тарап, басқа да әншілердің репертуарына енген.
Айта кетейік, Сердар Бердімұхамедов 2022 жылдан бері Түрікменстан президенті қызметін атқарып келеді. Әзірге оған ешқандай ресми атақ берілмеген. Дегенмен сарапшылардың пайымынша, Сердар Бердімұхамедов ел тарихында алғаш рет түрікмен газын Еуропа нарығына шығарған президент ретінде қалуы мүмкін. Бұл – аймақтың геосаяси жағдайына елеулі әсер ететін стратегиялық қадам болар еді.
Сарапшылардың пікірінше, "сұлтан" атағына қатысты идея тікелей Сердарға емес, оның әкесі – бұрынғы президент Құрбанқұлы Бердімұхамедовке де бағытталған болуы мүмкін.
