Әлеуметтік желіде "аутизмі бар балаларды өлтіру керек" деп пікір жазған блогер ата аналардан кешірім сұрады, деп жазады Alash.KZ.
Блогер видеоны көріп, “өте ауыр пікір жазғанын” мойындайды.
Бірақ мен аутист балалардың ата-аналарына жалпы жүректеріне тиеді деген арам оймен айтпадым. Мен де эмоцияға беріліп, ашулықпен жазып қойдым. Бәрі бала асырап отырғандықтан бала жайлы жүрекке батады екен. Ауыр айтқаным үшін аутист балалардың ата-анасынан кешірім сұраймын. Мен жаман оймен айтпадым. Ашуға беріліп, ойланбай айтып қойдым, дейді блогер.
Алматыдағы блогер Райхан Жұмамұратованың мәлімдемесі әлеуметтік желіде үлкен резонансқа себеп болды.
Ол Алматыда жасөспірім бір баланың қолын сындырғаны туралы жаңалықтың астына пікір қалдырған. Алдын ала болжам бойынша, ол аутист бала болуы мүмкін, бірақ диагнозы ресми түрде расталмаған.
– Аутизм бала көшеде нестеп жүр? Әке-шешесін соттау керек!!!! Аутизм көп болып кетті, емдету керек емделмесе өлтіру керек, болмаса аутизмге арнап аурухана ашу керек. Аутизм балада ешқандай сезім болмайды!!! Әке шешесі мән бермейді неге? Неге ай қарап жүреді, сондай диагноз балаларды көшеге еркін жіберіп қойып, – деп жазды блогер.
Полиция блогерге қатысты шара қолданылатынын мәлімдеді. Мәжіліс кулуарында журналистер еңбек және халықты әлеуметтік қорғау министрі Светлана Жақыповадан жағдайға пікір білдіруді сұрады.
– Әрине, мұндайға мен теріс қараймын. Мұндай фактілер болмауы тиіс. Біз инклюзивті қоғам құрып жатырмыз. Аутизмі бар балалар бірнеше мемлекеттік органның ерекше бақылауында. Біз бұл балаларды толық қолдаймыз. Ал блогерге қатысты құқық қорғау органдары дұрыс шешім қабылдайды деп ойлаймын. Ең қатаң шара қабылдануы керек, – деді министр.
